enen habsch noch...

Prof. Dr. Manfred Lemmer`s
Läbkuchenhärze
So kurz vor Weihnachten warsch, da saate der Opa eenes Taches for sein Enkel: "Martin", saate, "weeßte was, mir zwee'e schlenkern heite ma ä Häppchen iwwern Weihnachtsmarcht."
Na, da war der kleene Scheeks jlei Feier un Flamme, un nach'n Middachbrot schacktense denn ooch los.
Da jabs nu viel ze bekneisten, awwer ooch de scheensten Difte stiechen in de Tulke. "Na, Meiner" ,saate der Opa forn kleen Käcker, "haste nich ä Wunsch? Mechste nich ä Häppchen was naschen, Zuckerwatte, Leckerhoni odder Läbkuchen? Odder willste ä Sießchen von Zoßchen, das achelt ooch."
"Oh", saate Martin, "so ä scheenes Läbkuchenhärze, wie se da an de bunten Bändchen bammeln un wo se mit Zuckerjuß ‚Frohe Weihnachten' druffjespritzt ham, so eens häddch jerne."
"Jeritzt", meente der Altlatz un koofte eens.
Der kleene Kerl war so jlicklich driwwer, dasse sich jar nich neinzezwacken traute.
Alse nu beede noch ä Weilchen weiterjestranzt warn, saate Martin: "Opa, ich mussemah."
"Ach du liewer Jott, jroß odder kleen?"
"Bloß ema lullern."
"Na denn jehts je. Passema uff, jehk hier hinter de Bude un ich stelle mer derfoor, da merkts keener, wennde da deine Saale machst."
Jesacht, jetan. Der kleene Scheeks popelte mit der een Flosse sei Hosenstall uff, was nich leichte jingk, weile janz klamme Finger hatte un weile in der annern sei Läbkuchenhärze hielt. Awwer nu warsch an den Tache ä Häppchen wind'ch, un alse nu losstriezte, da spritztes ooch tichtch ans Läbkuchenhärze dran. Da fingk der Kleene an ze funzen. Awwer der Opa treestet'n un saate: "Gomm, mei Gäcker, mer koofen e neies", un das hadde denn ooch jemacht.
Wie nu Martin mit z w e e Härzen in der Feme dastand, fraachte uff ema: "Opa, was machmern nu mit den nassen, wo ich dranjeseecht hawwe?"
Awwer der Altlatz war kee bißchen verlejen. Er jrinste un saate: "Weeßte was - awwer de derfst nischt verraten - , das schenkste der Oma, die titscht sowieso immer."